Шымкентте Нұрай Серікбайды өлтірген Шерхан Аймахан өмір бойына бас бостандығынан айырылды. Қылмыстық істі қараған судья Саммидин Темірәлиев Шерхан Аймаханды кінәлі деп танып, өмір бойына бас бостандығынан айыру жазасын тағайындады.
Сот үкіміне сәйкес, Аймахан Қылмыстық кодексінің 99-бабы 2-бөлігінің 5-тармағы («аса қатыгездікпен жасалған адам өлтіру»), 125-бабының 1-бөлігі («некеге тұруға мәжбүрлеу») және 115-бабының 2-бөлігі («сталкинг») бойынша кінәлі деп танылды.
Сотталушы жазасын қауіпсіздігі төтенше қылмыстық-атқару жүйесі мекемесінде өтейді.
Сонымен қатар Аймахан Нұрай Серікбайдың отбасына 25 млн теңге көлемінде өтемақы және мемлекетке 2 млн теңге шығын төлеуге міндетті.
Бұған дейін марқұмның отбасы соттан моральдық зиян үшін 10 млрд теңге, материалдық шығын ретінде 15 млн теңге өндіруді сұраған.
Ал қылмыстық істегі мемлекеттік айыптаушы сотталушыны өмір бойына соттауды сұрады.
